الأحد، 27 أبريل، 2008

أحبك يالله


اخيرا وجدت وقت للعودة لمدونتي الحبيبة يومين أجازة يعني ليس لي حجة أول مرة من فترة أجد دقائق اجلس فيها مع نفسي سالت نفسي سؤال وجيه ليه الحياة واخداني قوي كده بين شغل و بيت و مواضيع اسرية و اخري عائلية و لا اجد وقتا لأتنفس وسط كل هذا هل انا مستعدة للقاء الله سبحانه و تعالي لو جاءت لحظة الموت ما تخافوش انا مش مكتئبة و لا ده موضوع كئيب انا بجد بسأل نفسي بكل موضوعية و قلت اشرك اصدقائي معي نحن نعمل لدنيانا كأننا نعيش ابدا فهل نعمل لأخرتنا كأننا نموت غدا سؤال بسيط مش كده و جملةكتير بنقولها و نسمعها كن ليه ما نفتكرش الموت الا و احنا مكتئبين او حد بنحبه مات انا بقي خطر في بالي الموضوع ده من كتر ما انا منشغله لو في وسط كل ده فجأة عملت حادثة بالعربية او اصبت بأزمة قلبية مثلا يعني :))حقول ايه لربنا بذاكر icdl و مش بحفظ قرأن و لا حقول له ساعات بنسي الاذكار و ساعات اقول جزء و اسيب الباقي حقول له اخر يوم نويت اصومه كان امتي عارفين انا حاسة اني مش وحشة و بحب ربنا و بفتكره دايما في كل تصرفاتي لكن بردوا مش كفاية و متهيألي اغلبنا كده بنقرب من ربنا ساعات و بتسرقنا الحياة ساعات عشان كده قلت اناقش معكم هذا الموضوع نفكر بعض و نساعد بعض و نقترح افكار علي بعض ازاي نقرب من ربنا اكتر وسط مشاغل الحياة ازاي نستعد لملاقاته و احنا سعداء مش نتمني الموت لما نكتئب فاكرين اغلبنا في رمضان بيبقي المود بتاعه حلو اد ايه و هو بيصوم و يختم القرأن و يصلي التروايح و القيام ليه ما نحاولش نبقي كده علي طول اصدقائي طمعانة في ثواب من وراء هذه التدوينة يا تري فيه حد حيبدأ معي اكسب ثواب اني دعيته و يكسب هو ثواب انه خطا خطوة في طريق الله سبحانه و تعالي


تعرفوا انا حافظة أدعية كتير بحاول افتكر اي واحد منهم دلوقت اختم به التدوينة مش لاقيه غير اني اقول لربنا سبحانه و تعالي و لا يوجد غيره يراني او يسمعني الان حتي انتم لا تعرفوني


يارب انا احبك أقسم بك اني احبك أكثر من أي شيء أحبك اكثر من نفسي و اكثر من كل الدنيا يارب يارب فأغفر لي و سامحني وأجعل خيرأعمالي خواتيمها و خير أيامي يوم القاك فيه

الأحد، 13 أبريل، 2008

يارب انجح


اصدقائي اون لاين شفتم اللي جري لي مس ام احمد المدرسة اللي بقي لها ......... لا مش حقول لكم بقي لها اد ايهفي التدريس. المهم المس رجعت تلميذة تاني و بتروح المحاضرات كل يوم عشان تاخد شهادة ICDL يااااااه الواحد كان نسي الاحساس ده انا عارفة ان كلامي مش حيعجب صحابي الطلبة بس بجد احساس التلمذة ده احساس لذيذ جدا كان واحشني و ارجع البيت بقي و اذاكر و اخاف من الامتحان و اناقش زملائي في الاسئلة

طبعا واحد يسألني دلوقت و ابو احمد فين في القصة دي نسيت اقول لكم انه عايش احساس التلمذة معايا اصلنا زملاء في الدورة و نشتغل سوا بقي و نقعد علي جهاز و احد زي الطلبة الحبيبة زمان في السكاشن بس الفرق الوحيد ان احنا في الحلال مابنعملش غلط و بابا و ماما عارفين و موافقين :)) شفتم بقي اللي يرضي ربنا ربنا ما يحرمهوش من حاجة اديني عشت نفس الاحساس الحلال الا بالحق يا ا صدقائي لسه فيه حبيبة في الجامعة لغاية دلوقت و لا النظام اتغير .

دلوقت بتسألوني لما انت مشغولة في الدراسة و الشغل و مبسوطة بقصة الحب اللي عايشاها بعد 16 سنة زواج توجعي دماغنا بالتدوينة دي ليه :))

الحلو ما يكملش يا شباب العيب الوحيد في الموضوع ده اني سايبة 3 اولاد في البيت بيفكروني لما اشفهم اني ماما مش البنوتة التلميذة الصغنونة اللي دايما متحمسة للعلم مش بقول لكم ياااااه من بقي يتابع المذاكرة للشباب الحلو اللي في البيت ده طول ما بابا و ماما عايشين دور التلمذة عشان كده تركت المذاكرة و قلت استشير اصدقائي اعمل ايه يا حلوين اشتغل ماما و لا مس و لا تلميذة

انا في انتظار اقتراحتكم ساندوني معنويا و ادعوا لي انجح

ملحوظة :

ادعوا لي اجيب درجات اعلي من ابو احمد مش بس انجح اصل الحب و الود نقرة و المنافسة العلمية نقرة مش كافية تفوق علي في الثانوية العامةو دخل الطب و انا التربية كله الا الكمبيوتر شفتم الحب قوي اد ايه :))