السبت، 23 فبراير 2008

درس لمن يبيعون الوطن







هذه صورة امرأة مسلمة عربية فلسطينية أبية تمسكت بدينها وشرفها وعرضها، وأبت أن تغادر أرضها لتتم مصادرتها من قبل جيش الإحتلال الإسرائيلي، وزرعت جذورها في عمق هذه الأرض، غير آبهة بالتهديد والإرهاب لأن في حقها القوة التي لا يمتلكها خمسة من إخوان القردة والخنازير ولا حتى كل جيشهم، رغم أسلحتهم وبأسهم، وبطشهم، وحقارتهم، فنظراتها ترعبهم، وصمودها يزلزل الأرض تحت أقدامهم ، و لم يجدوا حلا لإخراجها من أرضها غير أن يحملها "خمسة" منهم

‏والسؤال الآن: ‏ما هو شعورك عندما ترى هذه الصورة؟

‏هل تشعر بالفخر ؟
لوجود مثل هذه المرأة المسلمة المتشبثة بحقها وأرضها ودينها وعرضها في زمن رخصت فيه الأعراض وضاعت فيه الحقوق وقل فيه الرجال فتقول: ‏نريد ألفا من هذه المرأة !

‏هل تشعر بالأسى ؟
للظلم الذي يقع على أختك المسلمة وأمثالها وما يعانون من انتهاك لأرضهم وضنك في عيشهم وقهر في معيشتهم!

‏هل تشعر بالقهر ؟
لعجزك عن القيام بأي شيء تجاه ما يحصل لها ولأمثالها، فأنت بحكم عروبتك مقيد مسلوب الإرادة!

‏هل تشعر بالعار ؟
وأنت ترى حرمة أختك المسلمة تنتهك وتستباح على الملأ، وليس هناك من يحرك ساكنا!

‏هل تشعر بالخزي ؟
لانتمائك إلى أمة عربية فقدت الإحساس والكرامة والعزة والرجولة والنخوة، ورضيت بالذل والهوان !

‏الكثير من المشاعر المتضاربة التي قد تجول في خاطرك وأنت تنظر إلى هذه الصورة، بعضها يشعرك بالرغبة بالبكاء أو الصراخ...
‏وبعضها يعزيك ويواسيك .
‏وبعضها يشعرك بالأمل وقرب الخلاص...
إذا شعرت بالضعف و قلة الحيلة، فلا تبخل عليهم وعلى نفسك بالإنفاق في سبيل الله و حشد المسلمين للتفاعل و المناصرة و .. الدعاء.

اللهم إنا نسألك بأنك أنت الله الأحد الفرد الصمد الذي لم يلد ولم يولد ولم يكن له كفواً أحد، ذو الجلال والإكرام، يا حي يا قيوم
ياقادر يا غفور يا ودود يا ذا العرش المجيد يا فعال لما تريد
نستغيث بك ونستنصرك لا ملجأ ولا منجا إلا إليك
يا مغيث
أغث المسلمين في فلسطين و العراق وفي كل مكان واحفظهم وأولادهم ونساءهم وشيوخهم
أقسمنا عليك أن تخذل وتدمر عدوهم
اللهم مجري السحاب، منزل الكتاب، هازم الأحزاب
تلقيت هذه الصورة علي الميل جزي الله من ارسلها خيرا و لو انه اوجع قلبي

الحق فكر و اكسب جايزة

كنت أتحدث أمس مع صديقة لي جامعيه و تعمل في الحكومة و كذلك زوجهاعن ظروف المعيشة و كيف ان مرتباتهم معا لا تكفي ثم نزلت اليوم اشتري بعض الأشياء و انا عادة لا انزل للسوق كثيرا "ربنا يخلي أحمد"و رأيت الأسعار الفظيعة و انا كنت اسمعها و اعاني منها و لكن يبدو ان للرؤية تأثير مختلف المهم خطر علي بالي سؤال علي من تجوز الزكاة طبعا جميعا نعرف مصارف الزكاة و لكني اسأل من هو الفقير الذي تجوز عليه الزكاة مارايك في اسرة مكونه من 4 افراد دخلها الشهري 500 جنيه هل يكفيها هذا المبلغ لأقل ضروريات حياتها ام تعتبر فقيرة يجوز عليها الزكاة طبعا الشباب اللي زي الفل اللي مش طايل شغلانة حيقول لي بس اطول نصفهم تيجي نحسبها :
متوسط 10 رغفة في اليوم و نصف جبنه بيضاء " ارخص الأنواع" في الأسبوع و بلاش حلاوة و مرتين لحمة فقط في الأسبوع" مجمده طبعا" و البيض حسب الظروف و الخضار ارخص نوع في السوق و ارز و مكرونة و فول و فلافل و لبن مغشوش و فاتورة مياه و كهرباء و غاز و بلاش التليفون يقطعوا السلك احسن اما باقي أصناف الطعام من فراخ و اسماك و انواع جبن مختلفة و كل الحاجات اللي علي رفوف السوبر ماركت فسنحاول ناخد فتوي بتحريمها عشان الأولاد ما يشبطوش فيها نقول لهم حرام زي الخمور و ننهي الموقف طبعا استحالة حد يمرض وتضطر الأسرة تجامل احد معارفها باختصار احذف بند الطوارئ بس لا تنسي بند مصاريف المدارس اللي خلوها ترمين عشان الناس تشتري كراسات و كتب خارجية مرتين أما الدروس الخصوصية فصعب ناخد فتوي بتحريمها و إلا المدرسين حيشحتوا انا كان ممكن اكتب لكم الارقام لكن قررت اسليكم و اسيبكم انتم تضعوا الارقام كانها لعبة سودوكو
عارفين حسيت بايه بعد ما كتبت الكلام ده انه كلام مش جديد عليكم و علي .اقولكم بقي علي الجديد انا لسه ما فقدتش الامل مش اتفقنا نكون ايجابين و مش معني اني فشلت اجد حل للمعادلة دي اني ايأس ابدا انا بس قررت اطرحها للنقاش و يمكن اصدقائي الذين سيقرأون هذا المقال بما لهم من عقليات حسابية لا املك مثلها يحلوا هذه المعضلة يلا يا حلوين يا ايجابين عايزة تعليقات تشمل حلول حقيقية و اطلقوا لخيالكم العنان للابتكار المهم تقدر الاسرةالمصرية تعيش بالمبلغ ده اما لو فيه اسر عدده اكبر او دخلها اقل من المثال اللي وضعته فلا اجدالحقيقة تعليق اقوله انا بطلت كتابة و فضلت افكر في تعليق باسم انهي بيه الموضوع لا اجد
لو لم تصلني حلول سأعتبر هذا اعتراف بالفشل من اصدقائي المدونين الايجابين
و انتم طبعا ابعد ما يكون عن الفشل يلا يا حلوين بدأ السباق صاحب افضل الحلول و اكثرها واقعية له جايزة و دي مفاجأة

السبت، 16 فبراير 2008

لو مش حتحلم معايا

لو مش حتحلم معايا مضطر احلم بنفسي
لكني في الحلم حتي عمري ما ححلم لنفسي
لو كنت راح افتش عن منصب و لا جاه
و اصاحب الحذر
دانا ابقي ما استحقش حلاوة الحياة و ضحكة البشر
يا صاحبي يا صديقي ياللي طريقك طريقي
دا انا يوم ما عيش لنفسي ده يوم موتي الحقيقي

شكرا للشاعر سيد حجاب مع انه الفها من اكتر من 20 سنه كأنه كتبها النهاردة مخصوص عشان يؤيد افكاري

هيا نبدأ


السبب في كتابتي لهذا للموضوع و تغير حالتي النفسية عن امس بعد زيارة مدونة د. الزعفراني التي سبق و حدثتكم عنها مدونة جميلة دخلتها اسمهاحنروق مصرو تعليق جميل ارسل لي اشعرتني ان مفاتيح الكي بورد ممكن تكون البداية"من يبذل قطرة الحبر اليوم سيبذل قطرة الدم غدا .. حين ينادي المنادي .. وتسنح للشهيد الفرصة ."

عارفين البداية لأيه لأننا نكون ايجابين صاحب مدونة حنروق مصر فكرني ان التغيير ممكن يبدأ من الحاجات الصغيرة التي تستطيع عملها و لا تحاسب نفسك علي مالا تستطيع مش عاجبك حال مصر بس مش قادر تمشي في مظاهرة تقول كده معلش اعمل حاجة تانية تغير وجه مصر اللي مش عاجبك بدايةبالدعاء و التقرب لله مرورا بكل التصرفات الصغيرة حتي لو بدأت كما قال الرسول (ص) يإماطة الاذي عن الطريق يعني ارفع ورقة من الارض ساعد شخص محتاج لك بنية صافية اوعد نفسك ان لسانك مش حيقول غير الكلام الصادق وان اسلوبك مع الناس حيكون أحسن حتي لو كانوا بيتكلموا بطريقة ........... انت الاحسن انت الارقي انت القدوة تقدر علي المسئوليه دي تقدر تكون قدوة تقدر تكون مختلف عن اصحابك لو اتكلموا في هيافة تقدر تحول الكلام لموضوع مفيد لو واحد منهم قال كلام خارج تقدر توقفه و تمنعه من غير ما تخسره و لا حتخاف صحابك يضحكوا عليك و يشتغلوك و حتقول لنفسك ما كل الناس كده ليه ابقي مختلف كلهم بيتكلموا كده .. كلهم بيتصرفوا كده .. اشمعني انا ؟؟؟؟؟؟

ما هي دي الشجاعة يا استاذ و هي دي القدوة يا استاذة ضع لنفسك هدف و لو صغير و اسعي تحققه و حاول تضع اهداف مشتركة مع اخرين و تحققوها سوا تبقي كسبت اصدقاء و كسبت ثواب و كسبت واحد يساعدك في مشروعك الاساسي !!!!!!!!!

مش عارف مشروعك الاساسي بعد كل الكلام ده انك تكون قدوة يا كابتن عشان ده بداية التغيير لكل اللي مش عاجباك في الكون

انا عارفة ان ممكن حد يقرا الكلام ده و يقول عليه انشاء او بلاش كلام فارغ أو كبر دماغك و انا حسأل اللي بيقول كده لوشايفه غلط ناقشني لو شايفه مش حيجيب نتيجة جرب و نشوف لو شايفه صح بس انت بقي اللي مش عايز او مش قادر تحاول دي قضية تانية حندعيلك تبقي شجاع و تقدر لما تعرف الصح تعمله

طيب انا راضية حكمكم بالذمة لو نصف شعب مصر أو حتي ربعه فكر انه حيكون قدوة للباقين في تصرفاته و ان التغيير حيبدأ من عنده البلد حيحصل فيها ايه

جرب حتخسر ايه لو ماحصلش التغيير الكبير حتكون علي الاقل كسبت نفسك بشكل جدبد حاسس انك صح و انك قريب من ربنا و ده سيعطيك احساس بالقوة و السعادة لن تتخيله الإ اذا جربته و لو حاولت مرة و فشلت ما تزعلش ما تيأسش علي رأي عمنا الشاعرسيد حجاب :

"كل اللي عايشين للبشر من حقهم يقفوا ويكملوا يمشوا و يتكعبلوا و يتوهوا او يوصلوا و اذا كنا مش قادرين نكون زيهم نتأمل الاحوال و نوزن الافعال يمكن اذا صدقنا نمشي في صفهم "

جرب تاني طول ما نت عايش حاول تكون الاحسن لنفسك و لمن حولك

علي فكرة مش معني اني كتبت الكلام ده اني ملاك او سوبرمان قصدي وومان :) انا زيكم بالضبط بنجح ساعات و افشل ساعات لكني عزمت و توكلت علي الله عشان انجح هذه المرة و قلت استعين بيكم نشجع بعض اتقفنا

هـــــــــيا نبـــــــدأ

الجمعة، 15 فبراير 2008

خواطر زيارة مدونة د/ الزعفراني

لسه بلدنا ماشية في نفس الطريق راجعة للخلف بثبات و عزيمة من اصحاب المصلحة لكن السؤال هل فعلت أنا شيئا لتغيير دلك هل فعلت أنت؟ كم مصري من الرافضين التعبانين قرر يعمل حاجة غير الوقوف في طابور العيش للأسف الجميع من دعاة التغيير و التطور بس بشرط شخص تاني هو الي يقوم بالعمل و يدفع التمن و لا اعفي نفسي من هدا الاتهام يمكن تكون الكتابة في المدونات هي الحاجة الايجابية الوحيدة اللي بيعملها بعضنا و لكن هل هدا يكفي و هناك من يدفع تمن افكاره في المعتقلات و نحن ندفع تمنها علي مفاتيح الكي بورد فقط اعذروني انا مش دايما كده ده انا كنت لسه بقول لأبني أمس :
ادا الشعب يوما اراد الحياة فلابد ان يستجيب القدر
و لابد لليل أن ينجلي و لابد للقيد أن ينكسر
لكن ده اثر زيارة مدونة د/ الزعفراني و قراءة يومياته في المعتقل و انا في بيتي مرتاحة اخر راحة علي العموم أنا بهدي له البيتين دول لو وصلوا له
لو يقصرون الذي في السجن من غرف علي اللصوص لهدت نفسها الغرف
لكن لها أمل أن يستضاف بها حر فيعبق في أرجائها الشرف

الثلاثاء، 12 فبراير 2008

ساعات


ساعات اقوم الصبح قلبي حزين
اطل برة الباب ياخدني الحنين
اللي اشتريته انباع واللي لقيته ضاع و اللي قابلته راح و فات الانين
و ارجع وا قول لسه الطيوربتن و النحليات بتطن و الطفل ضحكه يرن
مع ان مش كل البشر فرحانين
ادي اللي كان و ادي القدر و ادي المصير نودع الماضي بحلمه الكبير
راح اللي راح ما عدش فاضل كتير
ايه العمل في الوقت ده يا صديق
غير اننا عند افتراق الطريق نبص قدامنا
علي شمس احلامنا نلقاها بتشق السحاب الغميق
و ارجع وا قول لسه الطيوربتتن و النحليات بتطن و الطفل ضحه يرن
مع ان مش كل البشرفرحانين

الله يرحم صلاح جاهين

الأحد، 10 فبراير 2008

حاجة خفيفة


النهاردة جايةو جايبة لكم ورده مختلفة حاجة خفيفة شويةللترويح عن النفس طريقة عمل انواع مختلفة من السلطات و علي فكرة دي مش للجنس الناعم فقط انا اخترتالسلطات مخصوص عشان تبقي حاجة سهلة لو حب الشباب و الرجال يجربوها حتي عشان يتسلوا في اكلها و هما بيتفرجوا علي ماتش النهائي النهارده و بيتفرجوا علي مصر و هي بتكسب الكاس اهو نبقي كسبنا في حاجة قصدي حاجتين الكورة و الاكل :-)

و اليكم الان بعض الانواع و بالهنا و الشفا و ماتنسوش تدعولي و لاحظوا اني ما جبتش سيرة اللحمة مراعاة للظروف الاقتصادية

و ممكن تبدعوا في السلطات دي و تضيفوا او تحذفوا بعض المكونات يلا نبدأ:

سلطة البطاطس بالثوم

المقادير:

3بطاطس مسلوقة

5 فصوص ثوم

2 ملعقة مايونيز و ممكن حذفه و وضع ملعقة خل لو المايونيز غالي عليكم1

ملعقة ملح

1/2 ملعقة فلفل حسب الرغبة

الطريقة:
يقشر البطاطس ويوضع في الخلاط مع الثوم المفروم والمايونيز والملح والفلفل ويخلط جيداَتقدم باردة مع المكرونة أو الكشري



التبولة

اكلةلبنانية من اجل الوحدة العربية

المقادير : لحوالي 3 أشخاص

عدد 3 حزمة بقدونس خضراء نضرة

عدد 8 الى 10 أوراق نعناع (مش جذوع - الورق فقط

(عدد 3 حبات (طماطم) جامدة

عدد 3 بصلات خضراء بجذوعها الخضراء

برغل ناعم بمقدار نصف فنجان قهوة (حجم فنجان قهوة كامل اذا تحبون البرغل كثير)

عدد 2 ليمون ملعقة صغيرة

ملح

زيت زيتون بمقدار واحد و نصف فنجان قهوة ممكن نقلل الزيت

رشة فلفل أسود (رشة صغيرة جدا)

و رشة شطة حسب الرغبة

الطريقة :

-يفرم البقدونس ناعما بسكين حاد و يغسل بالماء على الأقل 4 مرات حتى تتأكدي من نظافته و يصفى- يغسل النعناع و يصفى و يفرم و يدفن في داخل البقدونس المفروم حتى لا يسود - تفرم البندورة ناعمة - يفرم البصل الأخضر مع أوراقه ناعما

يغسل البرغل الناعم و يصفى و ينقع مع عصير الليمون و الزيت و البهارات المذكورة أعلاه. (يفضل نقعه قبل نصف ساعة او ساعة فقط قبل التقديم)- عند التقديم يتم خلط الخضراوات المفرومة أعلاه ببعضها مع مزيج البرغل المنقوع و تقدم التبولة الى جانبها أوراق الخس و الف صحة و هنا.

جربوا هذه المقادير و شوفوا بنفسكم انها حتطلع تبولة لبنانية على أصولها

سلطة مشكلة ولذيذه

المقادير

باذنجان أسود مقطع مكعبات صغير ه ومقلى

بطاطس مقطعة صغيرة ومقلية أو مسلوقة

بقدونس مقطع صغير صغير

+ طماطم مقطع صغيرصغير

بصل أخضر قليل مقطع صغير

+ خبز أبيض مقطع صغير ومقلي يمكن حذفه

2ملعقة لبن زبادي يمكن حذفه

واحدة ملعقه مايونيز يمكن حذفه

+ قليل ليمونوفص ثوم + وذزة ملح

الطريقة

كل الخضار مقطعة صغير نوضع في صينية بايركس وتوضع كل الأشياء طبقه طبقه وفي الأخر اللبن الزبادي والخبز الناشف المقلي

و مش لازم صينية بايركس يعني يمكن حذفها و لو مش عجباك كلها احذفها و ريح نفسك

بألف مليون هنا و شفا و متنسوش تسموا الله قبل ما تاكلوا


السبت، 9 فبراير 2008

اللهم احسن خاتمتنا

اللهم أقسم لنا من خشيتك ما تحول به بيننا و بين معصيتك و اجعل خير اعمالنا خواتيمها و خير ايامنا يوم نلقاك فيه

شكر مستحق :لمن اهداني هذا المقطع نفعنا الله به جميعا

قصيدة أم الشهيد

اكتب لكم اليوم قصيدة أحبها من أكثر من 20 عاما حيث كانت موجودة في كتاب النصوص للصف الاول الثانوي وقتها و هي لشاعر مصري يسمي مصطفي عكرمة يؤسفني بشدة إني لا أعرف عنه معلومات اخري أقرؤها معي و انظروا كيف كانت مناهجنا في ذلك الوقت قبل ان يصبح الدفاع عن الوطن إرهاب و الاستشهاد إنتحار.
ذهبت تسأءل عن فتاها لهفي يسابقها آساها
السهد أضناها و نار الشوق تحرقها لظاها
و تكاد لولا الكبر و الايمان تهمي مقلتاها
بالأمس ودعها و يهب يحث للساح المسيرا
و تعاهدا أن سوف يكتب بالدم النصر الكبيرا
أتراه وفي عهده أم أنه أمسي أسيرا
قالت سأسأل من اراه ليطمئن الان قلبي
قالوا اتعنين الفتي المغورا قالت اي و ربي
قلوا رأيناه بوجهك إن وجهك عنه ينبي
رأت الجراح بوجهه فأستبشرت تختال كبرا
كانت جراح الصدر تهتف إنني وفيت نذرا
إني وربك لم أدر يأ أم للأعداء ظهرا
ودنت تقبله فقالوا ملتقاكم في الخلود
قالت و دمع الفرحة الكبري تلألأ في الخدود
حسبي إذا ذكر الشهيد بأنني أم الشهيد

الجمعة، 8 فبراير 2008

البداية

اول مرة اقرر اكتب علي النت قلت لنفسي وليه لأ هما اللي بيكتبوا اشطر مني و اهي تجربة مش ساعات الواحد بيبقي عايز يقول اللي في نفسه و مش لاقي اللي يسمعه او عايز يكون ايجابي و مش عارف ازاي علي الاقل لما اري منكرا مش عارفة اغيره بيدي احاول اغيره بلساني و ربنا يجعلها في ميزان حسناتي ان شاء الله قولوا امين

احب اعرف نفسي لزوار مدونتي اللي ما يعرفونيش ده لو حد زارها يعني :)

انا ام مصرية لثلاث ابناء و اعمل مدرسة علوم و رغم كل مشاغل المنزل و العمل لقيت لسه عندي شوية طاقة قلت استغلهم في هذه المدونة و مش عارفة التجربة حتستمر ولا لأ لكن اهي تجربة زي ما قلت و يا عالم بكرة في ايه.

ابدأ حديثي الاول بتهنئة الدكتور ابو أحمد بعد ميلاده السعيد الذي توافق مع ميلاد مدونتي الصغيرة بس مش حقول الفرق بينهم كم سنة عشان الاحراج :)