الاثنين، 31 مارس 2008

قصة قديمة جديدة

اليوم انا قادمة لأحكي لكم قصة حدثت منذ زمن ليس بالقريب من حوالي 20 عام مش حأقول لكم كان عمري كام و قتها بس كنت في المدرسة و فاكراها كويس جدا زي ما تكون امبارح و الشهور الاخيرة بالذات بفتكرها كتير يمكن بعضكم فاكرها او سمع عنها صلوا ع النبي و نبتدي الحكاية:
كانيا مكان كان فيه شاب مصري طالب في كلية حقوق و في نفس الوقت مجند من باب توفير الوقت و من بخته جاء تجنيده علي حدود سبناء و فلسطين في وقت ما كانت الانتفاضة بدات بداية حامية

و في يوم من الايام و هو واقف في خدمته علي الحدود في منطقة مرتفعة قرب سبعة اسرائليين و حاولوا يتسلقوا المرتفع و يعبروا حاول يمنعهم بالكلام ما وقفوش حاول يهددهم بالبندقية ضحكوا و سخروا تفتكروا عمل ايه ؟؟؟
اتسرع و اتهور و اتهيألوا لا سمح الله ان دول من الاعداء مش اصدقاءنا الاسرائلين و تصور لا سمح الله انه مجند في هذا المكان و سلموه بندقيه بالطلقات لحماية المكان من المتسللين امثالهم را ح ضارب نار عليهم !!!!!!!!
اوعوا تفتكروا انه كده جندي و بيأدي عمله الدنيا قامت و لم تقعد و الصديقة العزيزة اسرائيل اشتكت لطوب الارض سامعة حد بيقول تتفلق
اخص عليك يبدو انك ارهابي بردوا نقتل احبابنا وولاد احبابنا
بسرعة اتنصبت المحكمة العسكرية و بسرعة صدر الحكم بالأشغال الشاقة المؤبدة علي المجرم القاتل و بالمرة اللي يمكن يكون مريض نفسيا
و فيه ناس تدافع عنه و ناس تحتج و ناس تستأنف الحكم لكن هو مين مجرم و خد جزاؤه



اوعوا تكونوا فاكرين القصة خلصت

تصدقوا تصدقوا المجرم القاتل يأما حس بالذنب انه قتل اليهود الابرياء المساكين يأما المرض النفسي رجع له تاني فبرغم انه بلغ اهله في احد الزيارات انه حيكمل دراسته و برغم انه بشهادة الجميع بيصلي و يعرف ربنا وجدوه في زنزانته مشنوقا بملاءة السرير!!!!!!!!!!!!!!!!
آه و الله و نشروا الخبر في كل الجرايد بكل بجاحة و اتقفلت القضية و مش مهم عمره اللي راح مش مهم امه اللي اتقهرت مش مهم بلده اللي اتبعترت كرامتها في التراب .. المهم اخوتنا الاسرائليين يرضوا هم و من وراؤهم .
رحم الله الشهيد المنحور و ليس المنتحر سليمان خاطر
خلصت الحدوتة حلوة و لا ملتوتة
ياتري ايه اللي خلاني افتكرها اللي بيحصل في غزة و لا البمبوطي اللي انضرب برصاصة امريكاني في السويس و لا اللي بيحصل في مصر كلها ؟؟؟؟؟؟؟ مش عارفة بس الله يرحمك يا سليمان عملت اللي انت شايفه صح و مشيت الدور علينا يا تري حنعمل ايه ؟؟؟؟؟؟؟؟؟

هناك 49 تعليقًا:

بحبك يامصر يقول...

ايه يا ام احمد الحكايات اللى تفتح النفس عالصبح دى؟
احنا عندنا كرم وجدعنه مش احنا والحلوه اسرائيل اصدقاء؟ تطبيع بقه وكلام من ده
يبقى لازم نوريهم اد ايه اخلاصنا احنا

يا ام احمد احنا دمنا رخيص عند حكومتنا وعند ريسنا احنا مش مهم عنده المهم الفلوس اللى بتتحول بره ربنا ينتقم منه
وربنا يرحم الشهيد اللى كدبوا علينا وقالو منتحر
تحياتى

nigro يقول...

ليه بس كده يا أم أحمد
ما احنا عارفين احنا ما نسواش حاجة في نظر أسيادنا
لازم يعني تدوسي على الجرح
بجد خلاااااااااص
زهقت و قرفت
****************
يأسك و صبرك بين إيديك و انت حر
تيأس ما تيأس الحياه راح تــمر
أنا دقت مندا ومندا عجبي لقيـت
الصبر مر و برضك اليـأس مــــر
و عجبي
****************
حسبنا الله و نعم الوكيل

الربان يقول...

تحياتي

رحم الله شهيد الواجب المجند سليمان خاطر
لقد دفع حياته ثمنا لاداء واجبه...كما دفع اخرون حياتهم ثمنا لتحرير الارض و محو الهزيمة....

نسأل الله ان يتغمد شهدائنا البرار بواسع رحمته...و ان يرزقنا شهادة خالصة له..


تحياتي و تقديري

عاشــــــ النقاب ـقــــة"نونو" يقول...

والقصة لسة ما خلصتش
ولسة هتتكرر
وربنا يعينك يا مصر
تحياتي يا ام احمد وعود حميد اختي بارك الله فيكي

أم أحمد المصرية يقول...

صديقي بحبك يا مصر
طبعا حكاية تفتح النفس بس علي الكفاح ضد الظلمة اما الشهيد فيابخته ياريت نطول مكانه عند ربنا

أم أحمد المصرية يقول...

عزيزي نبجرو فيه اختيار تالت غير اليأس و الصبر هو التحرك لتغيير ما لا نرضي عنه و لا نسيت تدوينة هيا نبدأ اللي كنت كتبتها من فترة
من الاخر انا بردوا لسه عندي امل ساعات بيقل و ساعات بيزيد بس عمره ما مات

أم أحمد المصرية يقول...

صديقي الربان شكرا علي مرورك الكريم و عندك حق هو ادي واجبه زي كتير غيره احنا بقي ادينا و اجبنا و لا لسه ؟؟؟؟؟

أم أحمد المصرية يقول...

صديقتي نونويم القصة حتتكرر طول ما كل واحد متهياله ان الحرامي اللي في شقة الجيران بعيد عنه لغاية ما يجده في حجرة نومه

أم أحمد المصرية يقول...

بالحق يا نونو ايه اخبار دروس السواقة شدي حيلك ماهو ده جزء من واجبك لرعاية اولادك و لا ايه عايزة اسمع اخبار حلوة و انا ورائك بالدعم و لن اتوقف عن تشجيعك

Desert cat يقول...

حمد الله على سلامتك يا ست الكل
بالنسبة لسليمان خاطر
انا ما عصرتش اللى حصله
لكن هو من قرية اكياد التابعة للمركز اللى انا ساكنة فيه
وعندى صحاب من هناك
بيحكوا لى على اللى مازال عيلته بيعملوه حتى الان كل سنة فى ذكراه
الله يرحمه ونحتسبه على الله شهيد
تحياتى

موناليزا يقول...

ومن وجهة نظرهم انه انتحر عشان يكفر عن ذنبه ولا لانه قتل اغلى الناس!!!
ومفكرينا هنصدق عادى!!!؟
يااه يا ام احمد هو احنا دمنا رخيص من زمان اوى كده؟

بنت الصالحين يقول...

استغفر اله العظيم

والله نفسيتي تعبت
منهم لله

شاب زي الورد
ضفره بكل الاسرائيليين الكلاب يحصله كده
ياسلام
ايه الجدعنه دي

منهم لله زنبه في رقابتك ياللي في بالي انت وكل اللي وراك

وحسبنا الله ونعم الوكيل

الله اكبر ع الظلمه والمفترين


ام احمد مدونه جميله ربنا يجعلها في ميزان حسناتك باذن الله

أم أحمد المصرية يقول...

صديقتي القطة حضرت و بتنونو عندي يا الف مرحب طبعا يا قمر ما عصرتيش اللي حصل اذا كنت انا كنت يادوب في المدرسة قولي لي اكياد دي شرقية مش كده اصل لي بعز الشرقاوة جدا اصل نصفي الاخر من هناك علي العموم اهل مصر كلهم جدعان اما اهل الشهيد فالله يصبرهم و يصبرنا علي ما ابتلانا

أم أحمد المصرية يقول...

حبيبتي الموناليزا اولا نورتيني تانيا با عزيزتي احنا دمنا رخيص من قبل كده بزمن و لا مش فاكرة الاسلحة الفاسدة و لا جنودنا اللي اترموا في صحراء سيناء في 67 و لا المعتقلين اللي بيموتوا علي مر السنين و لا ..و لا...ياااه سؤالك وجعني يا موناليزا

ahmd ebn om ahmd يقول...
أزال المؤلف هذا التعليق.
أم أحمد المصرية يقول...

صديقتي عاشقة الفردوس لو سمحت اوعي نفسيتك تتعب مش ده غرضي من التدوينة انا غرضي اثير الحماسة و اقدم المثل و اقدم لمحة تقدير للشهيد رحمه الله
و شكرا علي تقديرك لمدونتي المتواضعة

ahmd ebn om ahmd يقول...

قصة تثير القشعريرة فى الأبدان لكن على الأقل عرفنا أن الفساد موجود من زمان فلنقرأ الفاتحة على روح سليمان البطل الذين ينطبق عليه قول الله عز وجل
"ةلا تحسبن الذين قتلوا فى سبيل الله أمواتاً بل أحياأحياءا عند ربهم يرزقون"
صدق الله العظيم
ويا رب ينصلح حالنا ونقدر نورى اليهود إحنا تحت أمرهم
إزاى وفى أى وقت ده لإن المسئولين الكرام فاتحينلهم أبوابنا 24ساعة
والله يخرب بيتهم وبيت اللى يفتحلهم بابه ولو لثانية

----------------------------
علي فكرة شكرالكل من دعي لي بالسلامة في تدوينة ام احمد السابقةمع ان في ناس سألوا علي الكمبيوتر الاول :))))
و شكرا لأمي اللي دايما فاكراني حتي في تدوينتها اللي فاتت
ابنك "احمد ابن ام احمد"
و ابقوا اتفضلوا زوروا مدونتي يارب تعجبكم
Ahmd2110.blogspot.com
وبالله التوفيق

أم أحمد المصرية يقول...

يادي النور يادي النور بدر البدور منورني علي المدونة لا مؤاخذة يا اصدقائي اصل اقرب صدقائي كتب لي تعليق و ده حدث و ما قدرش اقولك واحشني لأنك امامي علي طول حبقي بضحك عليك لو قلت لك ياواحشني و انت قصاد عيني :)))
لكن بجد سعيدة بك مش ابني البكري ربنا يخليك لي يا حبيبي و ما يحرمنيش منك و يعطيك الصحة و دايما منورني و منور مدونتك بس بشرط :))))) تذاكر الاول

أميرة يقول...

سليمان خاطر

اعرفه سمعت حكايته دى زمان بعيد اوى مش فاكرة امتى ولا فاكرة مين حكهالى ولا ازاى بس فاكراها وفضلت عايشة جوايا سايبة لى احساس بالالم

وبشكرك لانك قلتيها وحكيتيها لكتير مايعرفوش عنها اى حاجة

وبشكرك لانى مكنتش اعرف تفاصيل كتير فيها
وبحيكى ياصديقتى العزيزة

أم أحمد المصرية يقول...

صديقتي سمو الاميرة مااكثر الحكايات التي تدفن في الماضي تاركة احساس الالم الدفين يمكن انا عشان اكبر منك في السن وجعتني جدا وقت حدوثهاو اللي جعلني افتكرها الان اني حسيت بنفس الوجع " ما اشبه اليوم بالبارحة "
لك خالص ودي و اهلا بك في كل وقت لأشعر بمزيد من الدفء في مدونتي

عمو يقول...

ازاى ننسى يا ام احمد

ولا بعد كمان 20 سنة

هو عمل اللى علية
ومرر الدور لينا

قلبتى علينا المواجع
صدقنا ما نسينا

اللة يرحم الجميع

أحمد سعيد علي الدين يقول...

أنا أول مرة أسمع القصة دي
لكن هي قصة بتتكرر كل يوم
هي قصة حكام باعوا وطنهم وشعبهم بأرخص الأثمان
قصة شعب مسكين عايش من زمان في الظلام

Empress appy يقول...

ده تسلسل لهدر الكرامه بتاعتنا
يا حبيبتى مش جديدة انما لما حد من عندنا يحصل له حاجه نكتفى بالاعتذار من الدوله التانيه
وسلمى ليه على الناس الحلوة

ملحوظه الصورة كنت جيباها من الفيس بوك بس انا سعيده انها بتاعتك وانا استخدمتها
ميرسى لزيارتك يا قمر

أم أحمد المصرية يقول...

صديقي الجديد عمو و هو ده المطلوب الا ننسي و نفضل دايما فاكرين من اللي باع و مين اللي اشتري
نورت مدونتي يا عمو و ابقي زورنا دايما
-------------------

أم أحمد المصرية يقول...

صديقي نور الازهر اولا مرحبا بك تانيا تلاقيك اصغر مني ما حضرتش الموضوع ده اللي كان سنه 1988 تقريبا و اهو التاريخ بيعيد نفسه

Desert cat يقول...

ميسرى يا حبيبتى على ترحيبك الجميل ده
وفعلا اكياد دى شرقية
ومبسوطة ان نصك شرقاوى
ده احنا لينا عظيم الشرف

أم أحمد المصرية يقول...

صديقتي الجديدة العسولة appy
نورتينيو حقول لك ايه غير اننا طول ما بنهون في بلدنا بنهون علي العالم
اما بالنسبة للصورة فالنت يا قمر متاح للجميع و انا يسعدني ان ذوقنا واحد

الباحث عن الحقيقة يقول...

أبله ام أحمد
ازيك يا خالتي الناظرة
بالتأكيد محدش ينسى سليمان خاطر
حتى العرب نفسهم مش ناسيينه
عموما هو اتحاكم محاكمة سياسية
علشان يكون عبره لأى جندى مصري على الحدود يفكر يضرب طلقه فى الهواء باتجاه اسرائيل حتى لو كان بيطلع فى الروح
لان هم اكيد اكيد مش قاصدين طبعا
على فكره ده تأثيره خطير جدا .. وبقول للقيادة السياسية فى مصر طز في الشعب ولا يهمك ولع فيه ..انما هتفرط فى دم جيشك .انت الخاسر الاول ..وما تسألنيش الطعنة الجاية هتجيلك بايد مين؟

الزواج.....روضة الحب يقول...

شكرا لزيارتك مدونتى ،وسامحينى لعدم تعليقى علي القصة دى لأنى بجد بدأت أتعب أوى من القصص المأساوية دى ،والله بجد بحس إن حد لف حاجة على رقبتى ،زهقت بجد من المآسىوالظلم وبحاول أتناسى ،حتى الجزيرة قاطعتها ،أعصابى بتتعب أوى ،المفروض ماقولكيش الكلام دة بس أنا مابعرفش أكتب غير اللى أنا حساه،ربنا يوفقك ويكرمك وهاجى تانى أوعى تزعلى منى ،يمكن أكون مدب شويتين تلاتة،بس والله طيبة وفرحت أوى أوى بتعليقك عندى اللى كان زى السكر0

أم أحمد المصرية يقول...

قطتي الحبيبة لا شكر علي واجب و اهلا بالشرقية و اهلها يا فرحة ابو احمد اللي بقي له سنين بيحفظني ان ش ك ع معناها شرقاوي كريم عطاء اجدع سلام للشرقاوة لأن اولادي كمن يعتبروا شرقاوة انا اللي لي الشرف

أم أحمد المصرية يقول...

صديقي العزيز الباحث عن الحقيقة نورت مدونة خالتك ام احمد ماشي يا عم حعيش دور العجوزة :)و لو اني لسه شباب بس مش حقول لك عمري احسن تقولي امال الشاب احمد ابن ام احمد اللي عامل مدونة ده ابنك ازاي و دي حكاية طويلة ربنا يخلي هو لي و يخلي ابن اختي الباحث عن الحقيقة
اعذرني علي المقدمة الطويلة اصلك اثرت شجوني لما اتعاملت معي علي اني خالتك الناظرة و حقوم انظر في المرايا لكون كده و مش حاسة :)))))
اما بعد رحم الله سليمان خاطر و امثاله من الشهداء و يا تري حنستني الطعنة الجاية لما تيجي و لا حنعمل حاجة هو ده السؤال؟؟!!

أم أحمد المصرية يقول...

صديقتي الزوجة العاشقة اسعد الله ايامك انا فاهمة احساسك جدا و يمكن ساعات بيجي لنا كلنا لكن ما ينفعش يبقي الحل لمشاكل حياتنا اننا نهرب منها و نبطل نتفرج علي الجزيرة :)
لأنها حتفضل موجودة و ربنا حيسالنا عملنا ايه فيها اهو انا بحاول ولو بكلمة او دعاء انا حسيت من كلامك انك بتحاولي تهربي بس شكلك كده يا حلوة ما بتعرفيش
علي العموم نورتيني و في انتظارك مرة تانية و ما بزعلش من اصحاب ابدا

غير معرف يقول...

السلام عليكم يااختي لو القصة دين جد يبقي الموت اهون والله - يذمتك القصة ديت جد - المشتاق لله

أم أحمد المصرية يقول...

صديقي المشتاق لله و رب العزة حقيقة اعمل ايه اكتر من ذكر اسمه لو قرات التعليقات ستجد البعض لسه فاكره هو توفي 7 يناير 1988 تقريبا رحمه الله و رحمنا مما نحن فيه

Unknown يقول...

العزيزة

ام احمد

كل الشكر لك ورحم الله اخينا العزيز

سليمان خاطر

ويكفى انه مع الصديقين والشهداء ان شاء

الله وسيظل رمز للبطولة امامنا

فى انتظارك بوست ينتظر نشره بين الجميع

أم أحمد المصرية يقول...

استاذي و زميلي العزيز في وزارة التعليم اهلا بك في مدونتي كان نفسي ارحب بك بحرارة اكتر بس المشكلة اني قبل كتابة الرد دخلت اقرأ البوست اللي حضرتك قلت لي عليه فأصبحت في مود مش مضبوط هما اليهود نفس اليهود من ايام المسيح عليه السلام حسبنا الله و نعم الوكيل و لا نامت اعين الجبناء المتخاذلين الخونة
اين انت يا صلاح الدين

Unknown يقول...

السلام عليكم ورحمة الله وبركاته
ام احمد المصريه**
حياك الله
انا جايه احييك واثبت حضور وبعد كده ان شاء الله نقعد ونقول كل حاجه بالتفصيل

اعجبتنى المدونة واعجبنى تباين افكارها(مثل حال حبيبتى مدونتى)
واطلب منك كمان الاذن بوضع بوست سليمان خاطر عندى مع الاشارة لصاحبة البوست الاصلية حيث ان كثيييرين لا يعلمون من هو رحمة الله عليه واسكنه فسيح جناته
وتقبلى تحياتى وامتنانى مسبقآ لردكم الكريم.
norahaty

Hossam Nasr يقول...
أزال المؤلف هذا التعليق.
Hossam Nasr يقول...

السيدة أم أحمد المصرية

أسعدني جداً أن أكون اليوم في ضيافتكم وفي أولى زياراتنا لمدونتكم الكريمة

وكم يزيدني خجلاً أن أصب من قلمي حبراً بعدما سقى قبلي من هم أقدر وأجدر مني وأكثر رفعة وأعلى قدراً كالسيدة أمة الله والسيدة نورهاتي والسيدة عاشقة النقاب وغيرهم .

ولذا فاعذريني إن كان تعليقي مقتضباً ولكن لكل منا قدره وأنا أعرف قدري

نحسب الرجل المصر شهيداً على الله وما ذاك على الله بعزيز ونذكر فقط بقوله تعالى
وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ [إبراهيم : 42]

أعتذر عن الحذف السابق وإنما لوقع أخطاء إملائية.

إحترامي وتقديري

الفارس الملثم يقول...

تعرفي انا يمكن سمعت عن القصة دي بعدين نس مكنتش اعرف تفاصيلها , لو كان المجند ده ربما كانت التهمة انه تسرع او حتي كان محنون ,,,

بس يا تري البمبوطي اللي اتقتل بدم بارد في وطنه ومات وهو مش عارف ايه الخطأ اللي عمله , يمكن خطأه , انه مكنش مدرك انه ارخص من الرصاصة اللي في مسدس اي امريكي علي راسه الريشة المعروفة اللي بتديه تصريح بالقتل دون حساب ..

مجداوية يقول...

أم أحمد
أختى فى الله
أخدت جولة فى مدونتك بالطفطف وحمدا لله على سلامة أحمد ومدونة جميلة وعجبنى تعريفها من كا بستان وردة ومن كل سلاح طلقة
وطبعا قصة سليمان خاطر طلقة مدفع تذكر من نسى أنا واحدة منهم مش فاكرة الحكاية دى خالص وكانى مسمعتش بيها رغم انى من عشرين سنة كنت متخرجة من الجامعة ,وكنت فين وقتها ؟؟أكيد الدنيا كانت شغلانى او قرأت الخبر ومر مرور الكرام ,الحمد لله انى اتغيرت,,وبالقياس كم واحد بعد عشرين سنة حيفتكر البمبوطى ولا جنودنا على الحدود ولا الطفلة اللى قتلوها برصاصهم الغادر طيب دول استشهدوا بيد أعداءنا ,واللى استشهدوا بيدنا نحن !!! كم غريق لعبارات الموت ؟؟كم شاب انتحر على شواطء وبحور الغربة .كم فرد قتل من أجل رغيف عيش !!! عندها حق زوجة عاشقة تتعب وتتألم لكن حقهم علينا الا نبعد ونهرب من ألمنا فهذا الألم أضعف الايمان

سعدت جدا بزيارتك لى وعودا حميداوتحياتى لأحمد ولأم أحمد اللى أكيد مصرية مفيش أم أحمد مش مصرية دى تريد مارك (علامة مسجلة)

واحد من البلد دى يقول...

الـدنيـا دى مكتبـة.واحنـا يا ناس كتــاب
فينا اللى يكتب علوم أو نحو ولا حساب
والصفحة مهما تكون طويلة وعريضـة
آهى ف النهاية بتفضل.صفحة جوه كتاب
...وعجبىالأخت الفاضلة..مع أنها أول زيارة لمدونتك إلا أنها إن شاء الله لن تكون الأخيرة...المعنى الذى أريده أن يصل من رباعيتى التى بدأت بها تعليقى.أن هذه القصة ليست الوحيدة على الإستيهان بالإنسان العربى عامة والمصرى خاصة..وهذه ليست المرة الأولى التى تخرج إسرائيل لسانها لنا جميعا.وكأنها تقول....بالعامية(الراجل فيكوا يورينى نفسه)..دمتى عالية الإحساس..أرجو التواصل

أم أحمد المصرية يقول...

صديقتي الجديدة المنورة norahaty
و انا بقول ايه النور ده ياحبيبتي المدونة و التدوينة و صاحبتهم تحت امرك انا يسعدني انك تعيدي نشر البوست بتاعي جعله الله في ميزان حسناتك و حسناتي و اسفة علي التأخير في الرد يارب دايما تمضي حضور و ما تمضيش انصراف من عندي

أم أحمد المصرية يقول...

صديقي الفاضل وسبرز
انا اللي سعيدة بزيارتك التي تزيدني فخرا بمدونتي المتواضعة فمرحبا بك و بكل الاصدقاء الاعزاء الذين ذكرتهم فبكم جميعا يصبح لهذه التدوينات معني و قيمة نفعني الله بها يوم القيامة و جمعنا جميعا في جنته
قول آمين

أم أحمد المصرية يقول...

صديقي الفارس الملثم
طول ما بنهون علي روحنا بنهون علي الناس ربنا يرحم كل الشهداء و يرحمنا و ينصرنا علي ضعفنا عشان نقدر يبقي دمنا اغلي من الرصاصة الامريكاني

أم أحمد المصرية يقول...

صديقتي المجداوية يالا المجد الذي حظيت به مدونتي بتشريفك :)
اهلا بيك يا حبيبتي و شكرا علي سؤالك علي احمد لا اتعب الله لك حبيبا
اما عن الشهيد سليمان خاطر فكم ينسي البشر اخيتي فسبحان من لا ينسي و لا ينام سبحان من يذكر الشهيد و يعرف القاتل حتي لو ضاعت الحقوق في الدنيا لن تضيع عند الله فإلبه اشكوضعفي و قلة حيلتي و هواني و بلدي علي اليهود و الامريكان

أم أحمد المصرية يقول...

صديقي واحد من البلد دي
البلد دي فيها كتير
ظلم و قهر و هم كبير
و دورنا احنا نقول لأ
و لو كان نفسنا الاخير
---------------------
نورتني و اضفت بتعليقك قيمة اكبر لمدونتي فهي تعلو بكم اما القصة القديمة الجديدة فعلي الاقل بنشرها عشان احارب المنكر بلساني و اختصم الظلمة امام الله سبحانه و تعالي يوم القيامة

DayDreaming يقول...

يمكن تكون القصه قديمه بس احداثها بتحصل كتير الوقتي

مدونه جميله اوي
خالص تقديري

بنات صاحبة الجلالة يقول...

ام احمد المصرية بنت بلدي اسعدنا التواجد بين صفحات مدونتك الرائعه الموضوع اللي طرحتيه جميل اوي المشكلة مش في الشاب اللي اتهمته الحكومة انه مريض نفسيا احنا اصلا بقينا حكومة المرضي النفسينن اي حاجة نلزقها للمرضي النفسين وينتهي بيه الحال ورا الشمس او ميرجعش تاني وعلي راي المثل فرعون مين فرعنك احنا اللي خلنا الاخوة الاعداء يعملوا كدا فينا ويستبيحوا كرامتنا ودمنا

تسلم ايديكي على الموضوع