الأحد، 13 أبريل 2008

يارب انجح


اصدقائي اون لاين شفتم اللي جري لي مس ام احمد المدرسة اللي بقي لها ......... لا مش حقول لكم بقي لها اد ايهفي التدريس. المهم المس رجعت تلميذة تاني و بتروح المحاضرات كل يوم عشان تاخد شهادة ICDL يااااااه الواحد كان نسي الاحساس ده انا عارفة ان كلامي مش حيعجب صحابي الطلبة بس بجد احساس التلمذة ده احساس لذيذ جدا كان واحشني و ارجع البيت بقي و اذاكر و اخاف من الامتحان و اناقش زملائي في الاسئلة

طبعا واحد يسألني دلوقت و ابو احمد فين في القصة دي نسيت اقول لكم انه عايش احساس التلمذة معايا اصلنا زملاء في الدورة و نشتغل سوا بقي و نقعد علي جهاز و احد زي الطلبة الحبيبة زمان في السكاشن بس الفرق الوحيد ان احنا في الحلال مابنعملش غلط و بابا و ماما عارفين و موافقين :)) شفتم بقي اللي يرضي ربنا ربنا ما يحرمهوش من حاجة اديني عشت نفس الاحساس الحلال الا بالحق يا ا صدقائي لسه فيه حبيبة في الجامعة لغاية دلوقت و لا النظام اتغير .

دلوقت بتسألوني لما انت مشغولة في الدراسة و الشغل و مبسوطة بقصة الحب اللي عايشاها بعد 16 سنة زواج توجعي دماغنا بالتدوينة دي ليه :))

الحلو ما يكملش يا شباب العيب الوحيد في الموضوع ده اني سايبة 3 اولاد في البيت بيفكروني لما اشفهم اني ماما مش البنوتة التلميذة الصغنونة اللي دايما متحمسة للعلم مش بقول لكم ياااااه من بقي يتابع المذاكرة للشباب الحلو اللي في البيت ده طول ما بابا و ماما عايشين دور التلمذة عشان كده تركت المذاكرة و قلت استشير اصدقائي اعمل ايه يا حلوين اشتغل ماما و لا مس و لا تلميذة

انا في انتظار اقتراحتكم ساندوني معنويا و ادعوا لي انجح

ملحوظة :

ادعوا لي اجيب درجات اعلي من ابو احمد مش بس انجح اصل الحب و الود نقرة و المنافسة العلمية نقرة مش كافية تفوق علي في الثانوية العامةو دخل الطب و انا التربية كله الا الكمبيوتر شفتم الحب قوي اد ايه :))

هناك 36 تعليقًا:

بحبك يامصر يقول...

ياااااه يأم احمد
انتى بتنسينا بتدويناتك كتير عالعموم مبروك الاحساس الحلو اللى انتى عايشاه ده
انا قولت مبروك عشان انتى فرحانه بيه واكيد هو احساس حلو عشان انتى وابو اجمد مع بعض اما بقه عن استفسارك مع دعائى لكى بالنجاح والتوفيق وتجيبى درجات عاليه بس مش اعلى من ابو احمد تحيزا للرجال اللى انا منهم
انا بقولك العيال وتربيتهم اهم بس طبعا ده مش معناه انك تسيبى المذاكره والدوره
يعنى وازنى بينهم وان معرفتيش يبقى الامومه اهم
وتحياتى ليكى وابو احمد ول احمد واخواته

فرنسا هانم يقول...

انا بدعيلك تجيبى درجات اعلى من ابو احمد
معلشى العلم مفهوش ست وراجل
وبدعيلك تجيبى درجات اعلى من كل اللى معاكى فى الدوره
وربنا يوفقك
واهم حاجه خلى بالك من الاولاد
تحياتى لكى
ووحشتينى

عاشــــــ النقاب ـقــــة"نونو" يقول...

السلام عليكم يا ام احمد
احساس التلمذة دة الواحد حس انه لذيذ فعلا لما سابه
ربنا يكرمك انتي وابو احمد واحمد والعيال ويبارك فيكم وتنجحوا كلكم يارب
تحياتي وابقي طمنينامين الالفة

الربان يقول...

ام احمد...
تحياتي

التعلم مستمر معنا خلال رحلة حياتنا
و بما ان حضرتك تربوية اكيد هاتعرفي
ان التعلم هو مفتاح النجاح...و ليس التعليم....

مبروك عليكما دورة ICDL وخطوة ممتازة
و ياريت كل الشباب يلتحقوا بها لانها مهمة جدا لهم مهنيا و حياتيا...
ام بالنسبة للتفوق...فأكيد انك ستحصلين علي درحات أعلي من ابو أحمد..السبب ؟ لا ...لن اقول لك...انتي عارفاه....هههههههه.

تحياتي و تقديري و تمنياتي لكما بالتفوق و التوفيق.

أم أحمد المصرية يقول...

صديقي بحبك يا مصر الله يبارك فيك بس شكلك كده مش مبسوط لعله خير يا صديقي اما محاولة التوازن بين الدورة و الامومة فبحاول بس قربت اقع من طولي :) دعواتك

أم أحمد المصرية يقول...

فرنسا هانم عندنا يا مرحبا يا مرحبا بجد بجد وحشتيني و انا مقصرة في زيارتك بس اديني حكيت لكم الظروف بس اوعي تنسيني و شكرا علي دعواتك و عاش الاتحاد النسائي :))

أم أحمد المصرية يقول...

صديقتي الحلوة نونويم شكرا علي دعائك الجميل اكرمنا الله جميعا بجنته
بس قولي لي يا حلوة ايه اخبار دروس السواقة انا لسه ماسكة الراية و عمالة اشجعك من ساعتها شدي حيلك بيب بيب نونوبيب بيب نونو:))

أم أحمد المصرية يقول...

صديقي الربان شكرا علي ردك و الله يبارك فيك و ان شاء الله حجيب اكتر من ابو احمد بس بمجهودي :)) قول امين
و فعلا الدورة دي مهمة جدا و مفيدة حتي للبيعرف كمبيوتر كويس بتجدد المعلومات بالاضافة لكونها شهادة دولية

أم أحمد المصرية يقول...

صديقي بحبك يا مصر كلاكيت تاني مرة
ابو احمد بيسلم عليك جدا و بيشكرك غاية الشكر و بيقولك شكلنا حنبقي صحاب :))
ماشي اطلع انا منها يعني علي العموم كان هناك فكرة من فترة باستضافة زوجي العزيز لكتابة تدوينة في مدونتي المتواضعة بس هو اللي مكسل و هاانا ادبسه اون لاين فانتظروا اصدقائي تدوينة ابــــــــــو احممممممد
تصفيق حاد :)))))

واحد من البلد دى يقول...

يا أم أحمد..المهم تنجحى وخلاص ...وإشتغلى الثلاث شغلات فى اليوم الواحد...أم فى الصباح(الباكر)ومس فى الظهيرة و تلميذة فى المساء...مع إن قلبى بيتقطع على أبو أحمد...تحياتى ليكى وله

مدونة كل العرب يقول...

هههههههههههههههه
يارب حضرتك تنجحى وتجيبى اعلى الدرجات
ولو اقدر اقدم اى مساعدة هكون سعيد للغاية - وبعتزر كتير على تاخرى على اهلى على الويب
تحية لكم جميعا

مجداوية يقول...

زمان قالوا
من طلب العلا سهر الليالى
يبقى مفيش علا من غير سهر وتعب ,,انت أمام مهمة شاقة ثلاثية الأبعاد يعنى بلغة المنظور مجسمة وهى بيتك وأولادك وعملك ودراستك وبالمنطق مش ممكن حتعرفى تعملى توازن بينهم الا بمساعدة اضافية بمعنى استعينى بحد ينظف معك البيت لو أولادك كبار شوية يبقى وكلى لهم مهام صغيرة كنت انت بتقومى بيها زى ترتيب السراير ,,غسل شوية أطباق متبقية ,أى أعمال صغيرة لكن لو عملتيها انت حتاخد من وقتك اللى بقى متقسم على تلاتة ,,مساعدة من الزوج المنافس لك فى الدراسة وده يكون بالاتفاق طبعا انه يساعد ولو بقدر بسيط أقله ميطلبش طلبات كتير كان بيطلبها وقت ما كان الوقت متقسم على اتنين ,,طالما دخلت فى الدراسة لازم تثبتى نجاحك وتفوقك لكن ما يقدر على القدرة الا ربنا يبقى الحل طلب المساعدة وهو حق مشروع بيغلفة الحب والتفاهم وان شاء الله حتتطلعى الألفة وتشرفى ستات الأسكندرية كلهم وستات مصر ,,وتحيا مصر ,,تحيا الثورة

ftafeet يقول...

اول مره اجيلك بس مش عارفه حسيت ان مدونتك هاديه جداااااا

ويارب يام احمد تنجحى وتجيبى درجاااات عااااليه جدااااا وانا كمان انجح

نونااا

(احمد سكر ) يقول...

ربنا يوفقك

وتحققى كل اللى بتتمنيه

تحياتى

احمد سكر

Unknown يقول...

اسف على التعليق الفاضى لسه جديد على البلوجر وبنسى ضغط قبل ما اكتب التعليق ..
-----------------------
طبعا يا بنتى يا تلموذة ربنا ينجحك وتجيبى درجات اكتر من الحبيب وطبعا انت عارفه تشغليه ازاى عيشيه قصة الحب وذاكرى انت ولا اقولك قسمى شغل الاولاد بينكم قولى احنا طلبه زى بعض يجب ان نتعاون

شكرا لك الاخت الفاضلة ام احمد

Ahmed Mubarak يقول...

لسه فيه حبيبة في الجامعة لغاية دلوقت و لا النظام اتغير .

مش عارف اقلك ايه .. لا تعليق بصراحة
:)
مره كلفت في الشغل اني أدرس دورة ال ICDL
لناس اكبر مني .. وكان في حبيبه برضوة .. ورغم انعم اكبر مني بحوالي 15 سنه بس كانوا لذاذ اوي .. وملحوظه محدش يعرفها بيني وبينك .. سر بيني وبينك

كنت بدي السيدات درجات اعلى في التقييم

تحياتي

أم أحمد المصرية يقول...

صديقي واحد من البلد دي شكرا علي اهتمامك و اديني بحاول ادعي لي اما ابو احمد فلا تقلق عليه اكتر واحد واخد حقه حتي المحاضرات انا اللي ببيضها :)))))))

أم أحمد المصرية يقول...

صديقي حرية الفكر فينك يا عم وحشتنا شكرا علي دعواتك و رغبتك الصادقة في المساعدة و لا تتأخر علينا تاني

أم أحمد المصرية يقول...

صديقتي الجميلة مجداوية شكرا علي اهتمامك و حلولك العملية هي دي فايدة الاصدقاء و ها انا احاول تنفيذ بعضها بس لا تنسيني في الدعاء و عاشت مصر حرة بينا و لينا

أم أحمد المصرية يقول...

فتفوتة الجميلة يارب انا و انت و اولادي و كل اصحابي و تلاميذي ينجحوا امين و المرة الجاية حاول اعمل شوية دوشة في مدونتي من باب التغيير :))))

أم أحمد المصرية يقول...

صديقي الجديد سكر شكرا علي مرورك و دعاءك الجميل حقق الله لك خير مما تتمني و ابقي زورني دايما

أم أحمد المصرية يقول...

صديقي و زميلي الفاضل شكرا علي دعاءك اما اقتراحك بخصوص ابو احمد انا فعلا مقسمة الشغل معاه انا اكتب المحاضرات و هو يذاكراها :))))))))

أم أحمد المصرية يقول...

صديقي الجديد احمد مبارك اولا نورت المدونة ثانيا اعذرني علي سؤالي اصل اخر عهدي بالجامعة من زمان و مش عارفة ايه اخر الاخبار لما احمد يدخلها بقي يبقي يحكي لي :)))
اما بقي حكاية التقييم علي اساس النوع دي فسرك في بير بس ابعت لي انت موبيل المدير بتاعك و مالكش دعوة :))
اكيد بتهزر مش كده يا احمد طمني ان الواقف في منصة المعلم لا يمكن الا ان يكون محايدا

عمو يقول...

ياااااه دانا أتأخرت قوى
اسف على التأخير دة

المهم ايوة انا عارف الموضوع دة
الوزارة بتخليكم تدرسو
icdl
وبتتطحنوا عارف ليا ناس كدة زيك
ربنا يوفقك
طبعا خلصتى الكورس ونجحتى مش كدة
:)
مهو كلام من 13/04/2008
بس عارفة بجد دى فرصة كويسة جدا وشهادة معتمدة من اليونيسكو وقديييييمة جدا بس فى بلدنا متقدمين شوبة عالرفة كمان فى اى مكان تانى فى العالم مش ممكن تشتغلى على كميوتر فى شغلك
من غير الرخصة دى

مبروك التفوق
ليكى ولأبو احمد
العلم والمعرفه مالهومش سن

بجد بجد
يعيش المعلم ولا يتعلم
:(

تحياتى

دكتور بهــدوء يقول...

انا لسه بدرس
بس متأكد ان الدراسه احسن ميت مره م بعد كده
ان شاء الله يكون احلي
بس وانت بتدرس لسه مانزلتش معترك الحياه مابقتش مسئول عن ناس تانيه
بس مسئول عن نفسك
واما عن درجاتك ودرجات الحاج ابو احمد
اللي يذاكر اكتر والبنانيت غالبا بيدحوا مووووت
وويارب تجيبي الفول مارك

ــــــــــــــ
اول مره اعدي ع المدونه بس
ان شاء الله
اكيد مش اخر مره
اسلوبك هاديؤ وحنين وتحفه

أم أحمد المصرية يقول...

يا اهلا يا عمو مهما اتأخرت تنور في اي وقت و شكرا علي امنياتك الطيبة بس لسه الكورس لم ينتهي انا مش باخده تبع التربية و التعليم مش بحب بهده المواعيد و الاماكن بتاعتهم انا كنت مقدمة في منحة وزارة الاتصالات انا و زوجي و ربنا وفقنا و قبلنا بعد امتحان مبدأي و عندك حق في انها قديمة جدا بس كانت غالية قوي في مصر ومازلت حتي الان الامتحانات لو علي حسابك تتكلف اكتر من 500 ج اما الكورس لوفي مكان محترم فمش حقول لك بقي
الحمد لله و ربنا يتمها لنا علي خير و ابقي دايما نورني

أم أحمد المصرية يقول...

صديقي الجديد دكتور بهدوء يا مرحبا بك في مدونتي المتواضعة لو كنت اعرف كنت فرشت لك سجاد احمر للترحيب بس الجوده الموجود فأهلا بك مرة تانية
اما بالنسبة لحكاية ايهما افضل فكل حاجة و لها ميزة و عيب طعاالدراسة لذيذة جدا " بس لو شاطر ":)) لكن بردوا الحياة العملية لذيذة انك تحس بكيانك و بقيمة ما تعمل و تحس طعم الفلوس اللي في يدك انها من تعبك "ده لو لقيت شغل ":)) متهيألي اكتر حد بيحس الاحساس ده الدكتور و المدرس مع خالص اعتذاري لكل المهن المهمة بس المهنتين دول بتري نتيجة عملك مباشرة علي الانسان اما المريض يخف او الطالب يتعلم او يتغير للافضل بتاثيرك عليه غير المحاسب او المهندس او ... مش بيشوف نتيجة عمله علي انسان امامه فمش بيفرح زينا
انا عارفة ان الكلام ده ممكن البعض يختلف معي فيه بس الخلاف لا يفسد للود قضية
ربنا ينجحك و اشوفك دكتور قد الدنيا الناس بتدعي له

الطائر الحزين يقول...

والله لسه بقول لواحد صاحبى انا عاوز ارجع اقعد فى المدرسة تانى

وانا بودى بنتى المدرسة ببقى عاوز اقعد فى الفصل


اما الدرجات يارب تجيبوا انتوا الاثنين زى بعض

اما الاولاد الايام هتعدى وان شاء الله يكونوا بخير

Empress appy يقول...

ربنا معاكى وتعزمينى على ايس كريم ماشى
بس حلو احساس انكم فى مكان واحد وبتأخدوا نفس الحاجه بجد وده تطوير من النفسهايل وتنفعوا بيه نفسكوا واولادكم ربنا يهنيكى يا رب

رئـــــيسـة حزب الأحلام يقول...

يلا ربنا معاكى ومع ابو احمد

Ahmed Al-Sabbagh يقول...

ههههه

دعوة للتضامن مع ام احمد

تا تعيش

تحياتى

أم أحمد المصرية يقول...

صديقي الطائر الحزين بعد اهلا و سهلا و مرحبا ايه رأيك تفكر ترجع تدرس تاني بجد حاجة لذيذة خصوصا لو مزاجك و شكرا علي المساندة المعنوية فعلا كله بيعدي و شكرا علي الدبلوماسية عاينا نجيب نفس الدرجة ماشي يا عم ي بعضه :)))

أم أحمد المصرية يقول...

عزيزتي ابي ايس كريم حجم عائلي بس تخلص الدورة و انجح احسن الاكسس ضرب في نافوخي . شكرا علي امنياتك الجميلة و يارب يحقق لك اكتر مما تتمني

أم أحمد المصرية يقول...

صديقتي رئيسة حزب الاحلام شكرا يا ريسة علي الدعوات و عقبال ما تنجحي في الانتخابات

أم أحمد المصرية يقول...

د. محمد لطفي شكرا علي مرورك الكريم و ابقي دايما شرفنا

أم أحمد المصرية يقول...

خالو احمد الصباغ عندنا يا مرحبا و كمان متضامن الله يكرمك بس كنا عايزين وقفة علي سلالم مركز الكمبيوتر للتضامن مع ام احمد و ابو احمد :)))
نورتنا يا خالو و ابقي دايما شرفنا