السبت، 16 فبراير، 2008

هيا نبدأ


السبب في كتابتي لهذا للموضوع و تغير حالتي النفسية عن امس بعد زيارة مدونة د. الزعفراني التي سبق و حدثتكم عنها مدونة جميلة دخلتها اسمهاحنروق مصرو تعليق جميل ارسل لي اشعرتني ان مفاتيح الكي بورد ممكن تكون البداية"من يبذل قطرة الحبر اليوم سيبذل قطرة الدم غدا .. حين ينادي المنادي .. وتسنح للشهيد الفرصة ."

عارفين البداية لأيه لأننا نكون ايجابين صاحب مدونة حنروق مصر فكرني ان التغيير ممكن يبدأ من الحاجات الصغيرة التي تستطيع عملها و لا تحاسب نفسك علي مالا تستطيع مش عاجبك حال مصر بس مش قادر تمشي في مظاهرة تقول كده معلش اعمل حاجة تانية تغير وجه مصر اللي مش عاجبك بدايةبالدعاء و التقرب لله مرورا بكل التصرفات الصغيرة حتي لو بدأت كما قال الرسول (ص) يإماطة الاذي عن الطريق يعني ارفع ورقة من الارض ساعد شخص محتاج لك بنية صافية اوعد نفسك ان لسانك مش حيقول غير الكلام الصادق وان اسلوبك مع الناس حيكون أحسن حتي لو كانوا بيتكلموا بطريقة ........... انت الاحسن انت الارقي انت القدوة تقدر علي المسئوليه دي تقدر تكون قدوة تقدر تكون مختلف عن اصحابك لو اتكلموا في هيافة تقدر تحول الكلام لموضوع مفيد لو واحد منهم قال كلام خارج تقدر توقفه و تمنعه من غير ما تخسره و لا حتخاف صحابك يضحكوا عليك و يشتغلوك و حتقول لنفسك ما كل الناس كده ليه ابقي مختلف كلهم بيتكلموا كده .. كلهم بيتصرفوا كده .. اشمعني انا ؟؟؟؟؟؟

ما هي دي الشجاعة يا استاذ و هي دي القدوة يا استاذة ضع لنفسك هدف و لو صغير و اسعي تحققه و حاول تضع اهداف مشتركة مع اخرين و تحققوها سوا تبقي كسبت اصدقاء و كسبت ثواب و كسبت واحد يساعدك في مشروعك الاساسي !!!!!!!!!

مش عارف مشروعك الاساسي بعد كل الكلام ده انك تكون قدوة يا كابتن عشان ده بداية التغيير لكل اللي مش عاجباك في الكون

انا عارفة ان ممكن حد يقرا الكلام ده و يقول عليه انشاء او بلاش كلام فارغ أو كبر دماغك و انا حسأل اللي بيقول كده لوشايفه غلط ناقشني لو شايفه مش حيجيب نتيجة جرب و نشوف لو شايفه صح بس انت بقي اللي مش عايز او مش قادر تحاول دي قضية تانية حندعيلك تبقي شجاع و تقدر لما تعرف الصح تعمله

طيب انا راضية حكمكم بالذمة لو نصف شعب مصر أو حتي ربعه فكر انه حيكون قدوة للباقين في تصرفاته و ان التغيير حيبدأ من عنده البلد حيحصل فيها ايه

جرب حتخسر ايه لو ماحصلش التغيير الكبير حتكون علي الاقل كسبت نفسك بشكل جدبد حاسس انك صح و انك قريب من ربنا و ده سيعطيك احساس بالقوة و السعادة لن تتخيله الإ اذا جربته و لو حاولت مرة و فشلت ما تزعلش ما تيأسش علي رأي عمنا الشاعرسيد حجاب :

"كل اللي عايشين للبشر من حقهم يقفوا ويكملوا يمشوا و يتكعبلوا و يتوهوا او يوصلوا و اذا كنا مش قادرين نكون زيهم نتأمل الاحوال و نوزن الافعال يمكن اذا صدقنا نمشي في صفهم "

جرب تاني طول ما نت عايش حاول تكون الاحسن لنفسك و لمن حولك

علي فكرة مش معني اني كتبت الكلام ده اني ملاك او سوبرمان قصدي وومان :) انا زيكم بالضبط بنجح ساعات و افشل ساعات لكني عزمت و توكلت علي الله عشان انجح هذه المرة و قلت استعين بيكم نشجع بعض اتقفنا

هـــــــــيا نبـــــــدأ

هناك 6 تعليقات:

القلم السكندري يقول...

التغيير علي مر القروون وسير الأنبياء لم يكن إلا بفئة قليلة

لكنها فئة تختلف كثيرا عن باقي الفئات

فئة تصدق مع الله في تغيير نفسها فيغير الله بها

وإن الله لا يغير ما بقوم حتي يغيروا ما بأنفسهم

تحياتي

أم أحمد المصرية يقول...

صديقي القلم السكندري كلامك صح بس بشرط انك تبقي متأكد ان الفئة دي موجودة و ان احد افرادها قريب منك جدا و لو مش مصدق قوم بص في المرايا
صـــــــــــح

أنا إنسان يقول...

اسمحيلي حضرتك اني اصرخ معك
وأقول
هيا نبدأ
فعلا
مش ناقصنا غير ان احنا نبدأ
وربنا لو بدأنا
ها يهدينا ان شاء الله

أم أحمد المصرية يقول...

صديقي صاحب المدونة الجميلة أناانسان
ردك اعطاني امل ان كلامي يجد صدي و مدونتك اعطتني امل اكبر ان فعلا فيه ناس بتحاول تعمل الخير و الصح بجد أثابك الله علي مدونتك الجميلة و علي رفع معنوياتي وزيادة يقيني بأن التغيير جاي يعني جاي

بحبك يامصر يقول...

شكرا ليكى يا ام احمد على ذكر اسم مدونتى عندك بس المدونه اللى انتى مسجلها عندك دى مدونة هنروق مصر ودى كانت دعوه من د\اجدع بنوته والدعوه دى بتهدف الى تفعيل دورنا احنا الشعب فى ازالة السلبيات الموجوده فى المجتمع اذا امكن بادينا ولو معرفناش بايدينا هيكون عن طريق اثارة المشكله والوصول بيها الى المسؤليين للحل.د\ اجدع بنوته هى اللى صاحبة الفكره وانا عجبتنى الفكره
وبس
بشكرك للإهتمامك ببلدك وحبك ليها ويارب الكل يحبها زيك كده

أم أحمد المصرية يقول...

صديقي بحبك يا مصر شكرا علي التوضيح و علي نشر الفكرة و شكرا لأجدع بنوته أنها فكرت فيها بامثالكم تتقدم الامم